ചില ആപ്ലിക്കേഷനുകൾ ബാറ്ററിയുടെ ആയുസ്സിനെ പ്രതികൂലമായി ബാധിക്കും
ഫേസ്‍ബുക്കിന് എതിരെ ഗുരുതര ആരോപണവുമായി മുൻ ജീവനക്കാരൻ
നെഗറ്റീവ് ടെസ്‌റ്റിങ് സ്‍മാർട്ട്ഫോൺ ബാറ്ററി പവർ രഹസ്യമായി ചോർത്തുന്നു
സ്മാർട്ഫോണിലെ ചില ആപ്ലിക്കേഷനുകൾ മറ്റുള്ളവയേക്കാൾ കൂടുതൽ പവർ ഉപയോഗിക്കുന്നു എന്നത് സത്യമാണ്. ഇത് ഫോണിന്റെ ബാറ്ററി(Battery)യുടെ ആയുസ്സിനെ പ്രതികൂലമായി ബാധിക്കും. എന്നാൽ ഈ വിഷയത്തിൽ പ്രമുഖ സാമൂഹ്യ മാധ്യമമായ ഫേസ്ബുക്കി(Facebook)ന് എതിരെ ഗുരുതര ആരോപണവുമായി രംഗത്ത് വന്നിരിക്കുകയാണ് കമ്പനിയിലെ ഒരു മുൻ ജീവനക്കാരൻ.
ഫേസ്ബുക്ക്(Facebook)മനഃപൂർവം സ്‌മാർട്ട്‌ഫോണുകളുടെ ബാറ്ററി(Battery)കളിലെ പവർ ഊറ്റിയെടുക്കുന്നുവെന്നാണ് ജീവനക്കാരൻ അവകാശപ്പെടുന്നത്. ഫേസ്ബുക്കി(Facebook)ൽ ജോലി ചെയ്‌തിരുന്ന ഡാറ്റാ സയന്റിസ്‌റ്റായ ജോർജ്ജ് ഹേവാർഡ് പറയുന്നതനുസരിച്ച്, സോഷ്യൽ മീഡിയ കമ്പനി നെഗറ്റീവ് ടെസ്‌റ്റിങ് (Negative Testing)എന്ന ഒരു പരിശീലനത്തിൽ ഏർപ്പെടുന്നു. ഇത് ഉപയോക്താവിന്റെ സ്‍മാർട്ട്ഫോൺ ബാറ്ററി പവർ(Battery Power) രഹസ്യമായി ചോർത്തുകയാണ് എന്നാണ് ആരോപണം.
ന്യൂയോർക്ക് പോസ്‌റ്റ് പറയുന്നത് പ്രകാരം, തന്റെ മുൻ തൊഴിലുടമയായ ഫേസ്ബുക്ക് (Facebook) അതിന്റെ ഉപയോക്താക്കളുടെ ഫോൺ ബാറ്ററികൾ മനഃപൂർവം നശിപ്പിക്കുകയാണെന്ന് ഹേവാർഡ് ആരോപിച്ചു. ഈ രീതിയെ നെഗറ്റീവ് ടെസ്‌റ്റിങ് എന്ന് വിളിക്കുന്നു. വ്യത്യസ്‌ത ഫീച്ചറുകളോ അവരുടെ ആപ്പുകളിലെ പ്രശ്‌നങ്ങളും ആപ്പ് എത്ര വേഗത്തിൽ പ്രവർത്തിക്കുന്നു അല്ലെങ്കിൽ ഒരു ചിത്രം എത്ര വേഗത്തിൽ ലോഡുചെയ്യുന്നു എന്നിങ്ങനെയുള്ള വിഷയങ്ങളും പഠിക്കുന്നതിനാണ് ഈ പരിശോധന നടത്തുന്നതെന്നാണ് റിപ്പോർട്ട്.
എന്നിരുന്നാലും, പരീക്ഷണത്തെക്കുറിച്ചുള്ള ഏറ്റവും മോശമായ കാര്യം എന്താണെന്നാൽ, ഇത് അവരുടെ സ്‌മാർട്ട്‌ഫോണിൽ നടക്കുന്നുണ്ടെന്ന് ഉപയോക്താവിന് ഒരു ധാരണയുമില്ല എന്നതാണ്. കമ്പനിക്കെതിരെ ഫയൽ ചെയ്‌ത ഒരു ലോസ്യൂട്ടിൽ ഹേവാർഡ് ഈ നടപടിയെ ദോഷകരമെന്ന് വിശേഷിപ്പിച്ചു.
"ഇത് പലരെയും ദോഷകരമായി ബാധിച്ചേക്കാം" എന്ന് താൻ മാനേജരോട് പറഞ്ഞുവെങ്കിലും അതിന് അവർ പ്രതികൂലമായി മറുപടി നൽകിയെന്ന് ഹേവാർഡ് ചൂണ്ടിക്കാണിച്ചു. "കുറച്ചുപേരെ ദ്രോഹിക്കുന്നതിലൂടെ നമുക്ക് വലിയ ജനവിഭാഗങ്ങളെ സഹായിക്കാം" എന്നായിരുന്നു മാനേജറുടെ മറുപടിയെന്ന് ഹേവാർഡ് ഓർത്തെടുക്കുന്നു.
അതേസമയം, 33 കാരനായ മുൻ ജീവനക്കാരൻ മാൻഹട്ടനിലെ ഫെഡറൽ കോടതിയിൽ ഫേസ്ബുക്കിനെതിരെ കേസ് ഫയൽ ചെയ്‌തിട്ടുണ്ട്. ഫെയ്‌സ്ബുക്കിന്റെ നെഗറ്റീവ് ടെസ്‌റ്റിംഗ് കാരണം ബാധിക്കപ്പെട്ട ഉപയോക്താക്കളുടെ കൃത്യമായ എണ്ണം തനിക്ക് അറിയില്ലെന്നും ഹേവാർഡ് വ്യക്തമാക്കി. എന്നാൽ ഫേസ്‌ബുക്കിന്റെ മാതൃ കമ്പനിയായ മെറ്റ മുൻ ജീവനക്കാരന്റെ ആരോപണങ്ങളിൽ ഇതുവരെ പ്രതികരിക്കാൻ തയ്യാറായിട്ടില്ല.
Follow Us
