വിവോയിൽ നിന്നുള്ള പുതിയ സെൽഫിഫോണിന്റെ വിവരങ്ങൾ പുറത്ത് വന്നു

നിരവധി മോഡലുകളുമായി വിപണിയിൽ സജീവമായിക്കൊണ്ടിരിക്കുന്ന വിവോയിൽ നിന്നും പ്രതീക്ഷിക്കുന്ന അടുത്ത സ്മാർട്ട് ഫോണായ വിവോ എക്സ് 9 എസ്  പ്ലസ് (Vivo X9s plus )-ന്റെ ചില സവിശേഷതകൾ  പുറത്ത് വന്നു. ലഭ്യമായ സൂചനകൾ പ്രകാരം വിവോയുടെ പുതിയ ഫോണെത്തുന്നത് ഇരട്ട മുൻക്യാമറകളോടെയാണെന്ന് പ്രതീക്ഷിക്കുന്നു.

സെൽഫിപ്രേമികളെ മാത്രം മുന്നിൽക്കണ്ടു  കൊണ്ട് നിർമ്മിക്കുന്ന ഈ ഫോണിന് ഇരട്ട സെൽഫിഷൂട്ടർ മിഴിവാർന്ന സെൽഫി ഇമേജുകൾ സമ്മാനിക്കുമെന്നതിൽ തർക്കമില്ല. 1.95 ജിഗാ ഹെർട്സ് വേഗതയുള്ള ഒക്റ്റാകോർ പ്രോസസർ പിടിപ്പിച്ചെത്തുമെന്നു കരുതുന്ന ഫോണിൽ പ്രതീക്ഷിക്കുന്ന പ്രധാന മെമ്മറി 4 ജിബിയുടേതാണ്.

3920 എം.എ.എച്ച് ബാറ്ററി കരുത്ത് പകരുമെന്ന് പ്രതീക്ഷിക്കുന്ന ഈ സെൽഫി കേന്ദ്രീകൃത ഫോണിന്റെ ഇരട്ട മുൻക്യാമറകളിലൊന്ന് 20 മെഗാപിക്സലും മറ്റൊന്ന്  5  മെഗാപിക്സലും ആയിരിക്കും. സെൽഫിക്യാമറയ്‌ക്കൊപ്പം 16 മെഗാപിക്സൽ വ്യക്തത നൽകുന്ന പിൻക്യാമറയും വിവോയുടെ പുതിയ ഫോണിലെ  ഫോട്ടോഗ്രാഫി അനുഭവത്തിനു  വ്യത്യസ്തത സമ്മാനിക്കും.