മൊബൈൽ ഉപയോക്താക്കൾ ഏറ്റവും അധികം നേരിടുന്ന ശല്യങ്ങളിൽ ഒന്നാണ് സ്പാം കോളുകൾ. വളരെ പ്രധാനപ്പെട്ട ജോലികൾ നിർവഹിക്കുമ്പോഴോ മീറ്റിങുകളിൽ പങ്കെടുക്കുമ്പോഴോ ഇത്തരം സ്പാം കോളുകൾ വരുന്നത് ഏറെ അലോസരം സൃഷ്ടിക്കാറുണ്ട്. ചെയ്ത് കൊണ്ടിരിക്കുന്ന കാര്യങ്ങളിൽ നിന്നും നമ്മുടെ ശ്രദ്ധ തെറ്റിക്കാനും ഇവ കാരണം ആകാറുണ്ട്. മിക്കവാറും സമയങ്ങളിൽ ആവശ്യമില്ലാത്ത സേവനങ്ങളായിരിയ്ക്കും ഇത്തരം കോളുകൾ ഓഫർ ചെയ്യുക.
ഏറ്റവും സാധാരണമായ സ്പാം കോളുകൾ ഏതൊക്കെയാണെന്ന് മനസിലാക്കിയിരിയ്ക്കണം. മുൻ കൂട്ടി റെക്കോർഡ് ചെയ്ത സന്ദേശങ്ങളാണ് റോബോ കോളുകൾ. ഇവ പലപ്പോഴും ഓട്ടോമേറ്റഡ് ആയിരിയ്ക്കും. ഉത്പന്നങ്ങളും സേവനങ്ങളും ആളുകളിലേക്ക് എത്തിക്കാനാണ് ഇത്തരം ഓട്ടോമേറ്റഡ് കോളുകൾ കൂടുതലായും ഉപയോഗിക്കുന്നത്. യഥാർഥ കമ്പനികൾ അവരുടെ ഉത്പന്നങ്ങളും സേവനങ്ങളും നിങ്ങൾക്ക് വിൽക്കാൻ ഉപയോഗിക്കുന്ന ടെലിമാർക്കറ്റിങ് കോളുകളും ഉണ്ട്.
ആൻഡ്രോയിഡ് ഉപയോക്താക്കൾക്ക് സ്പാം കോളുകളിൽ നിന്നും രക്ഷ നേടാൻ രണ്ട് ഫീച്ചറുകളാണ് ഗൂഗിൾ ഓഫർ ചെയ്യുന്നത്. കോളർ ഐഡിയും സ്പാം പ്രൊട്ടക്ഷനും ആണ് ഈ ഫീച്ചറുകൾ. ഇവ ഡിഫോൾട്ടായി തന്നെ ആൻഡ്രോയിഡ് സ്മാർട്ട്ഫോണുകളിൽ ആക്റ്റിവേറ്റ് ആയിരിയ്ക്കും. എന്നാൽ ഇവ ഓഫ് ചെയ്ത് ഇടാനും യൂസേഴ്സിന് സാധിക്കും.
അനാവശ്യ സ്പാം കോളുകൾ തടയാൻ വ്യക്തികളെ സഹായിക്കുന്നതിനായി ടെലികോം റെഗുലേറ്ററി അതോറിറ്റി ഓഫ് ഇന്ത്യ ദേശീയ ഉപഭോക്തൃ മുൻഗണനാ രജിസ്റ്റർ (എൻസിപിആർ) ആരംഭിച്ചു . ഡിഎൻഡി സേവനം സജീവമാക്കുന്നതിലൂടെ തിരഞ്ഞെടുത്ത വ്യവസായങ്ങളിൽ നിന്നുള്ള ടെലിമാർക്കറ്റിംഗ് ആശയവിനിമയമോ കോളുകളോ ഒഴിവാക്കാൻ ഈ സേവനം ആളുകളെ പ്രാപ്തരാക്കുന്നു.
ഡിഎൻഡി ആക്ടിവേഷൻ ആവശ്യപ്പെടാത്ത വാണിജ്യ കോളുകളെയോ തിരഞ്ഞെടുത്ത വ്യവസായങ്ങളെയോ മാത്രമേ തടയുകയുള്ളൂവെന്നും നിങ്ങളുടെ ബാങ്കിൽ നിന്നുള്ള SMS അലേർട്ടുകൾ, ഓൺലൈൻ പോർട്ടലുകളിൽ നിന്നും സേവനങ്ങളിൽ നിന്നുമുള്ള ആശയവിനിമയങ്ങൾ മുതലായവ തടയില്ലെന്നും NCPR-ലെ രജിസ്ട്രേഷൻ ഉറപ്പുനൽകുന്നു.