സ്മാർട്ട്ഫോണിൽ നിന്നും കൂടുതലായി ഡാറ്റ ചിലവാകുന്നത് തടയാം
ഫോണിൽ ഡാറ്റ ലിമിറ്റ് സെറ്റ് ചെയ്യാൻ സാധിക്കും
ഡാറ്റ സേവർ മോഡ് ഉപയോഗിച്ചും അധിക ഡാറ്റ വിനിയോഗിക്കുന്നത് ഒഴിവാക്കാം
ഇന്ത്യയിലെ എല്ലാ ടെലിക്കോം കമ്പനികളും ധാരാളം ഡാറ്റ ൽകുന്ന പ്ലാനുകൾ ലഭ്യമാക്കുന്നുണ്ട്, എങ്കിലും ദിവസവും ലഭിക്കുന്ന ഡാറ്റ പെട്ടെന്ന് തീർന്നുപോകുന്ന അവസരങ്ങളും ഉണ്ടാകാറുണ്ട്. മൊബൈൽ ഡാറ്റ വേഗം തീർന്നുപോകുന്നു എന്ന പരാതി നമ്മളിൽ പലർക്കും കാണും. ആൻഡ്രോയിഡ് ഫോണിൽ തന്നെ ഡാറ്റ ഉപഭോഗം ട്രാക്ക് ചെയ്യാനും അനാവശ്യമായി ഡാറ്റ ചിലവാകുന്നത് തടയാനും ചില വഴികളുണ്ട്. ഇത് എങ്ങനെയെന്ന് നോക്കാം.
ഫോണിൽ ഡാറ്റ ലിമിറ്റ് സെറ്റ് ചെയ്യാം
ഡാറ്റ ലിമിറ്റ് സെറ്റ് ചെയ്യുന്നതിലൂടെ ഒരു പരിധിക്ക് അപ്പുറം ഡാറ്റ ചിലവാകുന്നത് തടയാൻ സാധിക്കും. അത്യാവശ്യഘട്ടത്തിൽ ഉപയോഗിക്കാൻ കുറച്ച് ഡാറ്റ കരുതിവെയ്ക്കാനും ഇതിലൂടെ സാധിക്കും.
ആൻഡ്രോയിഡ് ഫോണിൽ ഡാറ്റ ലിമിറ്റ് സെറ്റ് ചെയ്യുന്നത്?
- സെറ്റിങ്സിൽ പോയി നെറ്റ്വർക്ക് / സിം / ഇന്റർനെറ്റ് എന്നീ ഓപ്ഷനുകൾ നോക്കുക,
- ഇതിൽ ഏതാണോ നിങ്ങളുടെ ഫോണിലുള്ളത്, അത് തിരഞ്ഞെടുക്കുക
- മുകളിൽ കൊടുത്ത ഓപ്ഷനുകളില്ലെങ്കിൽ ഡാറ്റ എന്നോ ഡാറ്റ സേവർ എന്നോ ഉള്ള ഓപ്ഷൻ ഉണ്ടായിരിക്കും.
- ഇന്റർനെറ്റ് ഓപ്ഷന് കീഴിൽ സർവ്വീസ് പ്രൊവൈഡറിന്റെ പേരിന് അടുത്തായി സെറ്റിങ്സ് ഓപ്ഷൻ കാണാം, അത് ക്ലിക്ക് ചെയ്യുക
- താഴേക്ക് സ്ക്രോൾ ചെയ്‌ത് ഡാറ്റ വാണിങ് & ലിമിറ്റ് എന്ന ഓപ്ഷൻ തിരഞ്ഞെടുക്കുക
- മൊബൈൽ ഡാറ്റ യൂസേജ് സൈക്കിൾ ഓപ്ഷനിൽ ടാപ്പ് ചെയ്യുക
- നിങ്ങളുടെ ഡാറ്റ യൂസേജ് സൈക്കിൾ എത്രയാണോ, അത് തിരഞ്ഞെടുക്കാം
- ഡാറ്റ ലിമിറ്റ് സെറ്റ് ചെയ്യാനായി സെറ്റ് ഡാറ്റാ ലിമിറ്റ് ഓപ്ഷനിൽ ടാപ്പ് ചെയ്യുക.
ഡാറ്റ സേവർ മോഡ് ഉപയോഗിക്കാം
ഡാറ്റ ഉപയോഗിക്കുന്നതിൽ നിന്നും നിയന്ത്രിക്കേണ്ട ആപ്പുകൾ ഏതൊക്കെയാണെന്ന് നിങ്ങൾക്ക് നേരിട്ട് തിരഞ്ഞെടുക്കാം. ഡാറ്റ സേവർ ഓണായിരിക്കുമ്പോൾ പോലും എത്ര വേണമെങ്കിലും ഡാറ്റ ഉപയോഗിക്കാൻ ചില ആപ്പുകളെ അനുവദിക്കുകയും ചെയ്യാം.
ഡാറ്റ സേവർ മോഡ് ഓൺ ചെയ്യുന്നത്?
- സെറ്റിങ്സിൽ പോയി നെറ്റ്വർക്ക് / സിം / ഇന്റർനെറ്റ് എന്നിവയിൽ ഏതെങ്കിലും ഓപ്ഷൻ തിരഞ്ഞെടുക്കുക
- ഡാറ്റ സേവർ ഓപ്ഷൻ തിരഞ്ഞെടുത്ത് ടോഗിൾ ചെയ്യുക.
ഡ്യുവൽ-ചാനൽ നെറ്റ്വർക്ക് ആക്സിലറേഷൻ ഓഫ് ചെയ്യാം
വൺപ്ലസ് പോലുള്ള ബ്രാൻഡുകളുടെ ചില സ്മാർട്ട്‌ഫോണുകൾ, ഡൗൺലോഡുകൾ വേഗത്തിലാക്കാൻ വൈഫൈയും മൊബൈൽ ഡാറ്റയും ഒരുമിച്ച് ഉപയോഗിക്കാൻ സാധിക്കുന്ന വിധത്തിലുള്ള ഡ്യുവൽ-ചാനൽ നെറ്റ്വർക്ക് ആക്സിലറേഷൻ ഓപ്ഷനുമായാണ് വരുന്നത്. ഇത് ഓഫ് ചെയ്തിട്ടാൽ നിങ്ങൾക്ക് ധാരാളം ഡാറ്റ ലാഭിക്കാം.
ഓട്ടോ അപ്ഡേറ്റ് വൈഫൈയിൽ മാത്രം
ഇന്റർനെറ്റ് കണക്ഷൻ ലഭിച്ചാലുടൻ ആപ്പുകൾ ഓട്ടോമാറ്റിക്കായി അപ്ഡേറ്റ് ചെയ്യാറുണ്ട്. നിങ്ങളുടെ സ്‌മാർട്ട്‌ഫോൺ വൈഫൈ നെറ്റ്‌വർക്കിലേക്ക് കണക്‌റ്റ് ചെയ്‌തിരിക്കുമ്പോൾ മാത്രം സെറ്റിങ്സ് മാറ്റാനും അവ ഓട്ടോ അപ്ഡേറ്റിലേക്ക് മാത്രം പരിമിതപ്പെടുത്താനും കഴിയും. ഗൂഗിൾ പ്ലേ ആപ്പ് തുറന്ന് മുകളിൽ വലത് കോണിലുള്ള പ്രൊഫൈൽ ഇമേജിൽ ടാപ്പ് ചെയ്യുക. തുറന്ന് വരുന്ന മെനുവിൽ നിന്ന് സെറ്റിങ്സ് ടാപ്പുചെയ്‌ത് നെറ്റ്വർക്ക് പ്രിഫറൻസ് തിരഞ്ഞെടുക്കുക. ഓപ്പൺ ആയി വരുന്ന സ്ക്രീനിൽ ആപ്പ് ഡൗൺലോഡ് പ്രിഫറൻസ്, ഓട്ടോ അപ്ഡേറ്റ് ആപ്പ്സ്, ഓട്ടോ-പ്ലേ വീഡിയോസ് എന്നിവ കാണാം. മൂന്ന് ഓപ്‌ഷനുകൾക്കും ഓവർ വൈഫൈ ഓൺലി എന്നത് തിരഞ്ഞെടുക്കുക.
ഡാറ്റ കൂടുതലായി ഉപയോഗിക്കുന്ന ആപ്പുകൾ ഒഴിവാക്കാം
ചില ആപ്പുകൾ ലോഡ് ചെയ്യാൻ കൂടുതൽ ഡാറ്റ ഉപയോഗിക്കുന്നുണ്ട്. ചില ആപ്പുകൾ ലോഡുചെയ്യാൻ അധികം വേഗതയുള്ള ഇന്റർനെറ്റ് കണക്ഷനോ കൂടുതൽ ഡാറ്റയോ ആവശ്യമില്ല. ഫേസ്ബുക്ക് ലൈറ്റ്, ഇൻസ്റ്റഗ്രാം ലൈറ്റ് പോലുള്ള ലൈറ്റ് പതിപ്പുകൾ മിക്ക സോഷ്യൽമീഡിയ ആപ്പുകൾക്കും ഉണ്ട്. ലൈറ്റ് പതിപ്പുകൾ ആണെങ്കിലും എല്ലാ ബേസിക് പ്രവർത്തനങ്ങളും ഇവയിൽ നടക്കും. ഡാറ്റ ലാഭിക്കാൻ ഇത്തരം ആപ്പുകൾ ഉപയോഗിക്കാം. കൂടുതൽ ഡാറ്റ ഉപയോഗിക്കുന്ന ആപ്പുകൾ ഒഴിവാക്കാം.
Follow Us
