ಮುಂಬರುವ ವಾರಗಳಲ್ಲಿ ಪ್ರಮುಖ ಐದು ನವೀಕರಣಗಳ ಬಗ್ಗೆ WhatsApp ಸಂಸ್ಥೆ ಅಧಿಕೃತವಾಗಿ ಘೋಷಿಸಿದೆ. ಈಗಾಗಲೇ ವದಂತಿಗಳು ತಿಳಿಸಿದಂತೆಯೇ WhatsApp ಅಪ್ಲಿಕೇಷನ್ ನಲ್ಲಿ ಎಮೋಜಿ ರಿಯಾಕ್ಷನ್, 2GB ವರೆಗಿನ ದೊಡ್ಡ ಫೈಲ್ ಹಂಚಿಕೆ ಸಾಮರ್ಥ್ಯ ಮತ್ತು 32-ಸದಸ್ಯರ ಧ್ವನಿ ಕರೆಗಳ ಸಾಮರ್ಥ್ಯಗಳು ಸೇರಿದಂತೆ ಒಟ್ಟು ಐದು ಹೊಸ ವೈಶಿಷ್ಟ್ಯಗಳು ಬರುತ್ತಿರುವ ಬಗ್ಗೆ WhatsApp ಸಂಸ್ಥೆ ಅಧಿಕೃತ ಮಾಹಿತಿಯನ್ನು ನೀಡಿದೆ. ಹಾಗಾದರೆ. ಮುಂಬರುವ ದಿನಗಳಲ್ಲಿ WhatsApp ನಲ್ಲಿ ಕಾಣಸಿಗಲಿರುವ ಆ ಹೊಸ ಐದು ವೈಶಿಷ್ಟ್ಯಗಳು ಯಾವುವು ಮತ್ತು ಅವುಗಳ ವಿಶೇಷತೆ ತಿಳಿಯೋಣ.
WhatsAppನಲ್ಲಿ ಎಮೋಜಿ ಪ್ರತಿಕ್ರಿಯೆಗಳನ್ನು ನೀಡಬಹುದಾದ ವೈಶಿಷ್ಟ್ಯವನ್ನು ತರುತ್ತಿರುವುದಾಗಿ WhatsApp ಸಂಸ್ಥೆ ಅಧಿಕೃತವಾಗಿ ತಿಳಿಸಿದೆ. ಈ ಹಿಂದೆ WhatsApp ಬಳಕೆದಾರರು ಪ್ರತಿಕ್ರಿಯೆಯನ್ನು ತಿಳಿಸಲು ಹೊಸದೊಂದು ಸಂದೇಶವನ್ನು ರಿಪ್ಲೇ ಮಾಡುತ್ತಿದ್ದರು. ಆದರೆ ಹೊಸ ವೈಶಿಷ್ಟ್ಯವು ಜನರು ತಮ್ಮ ಅಭಿಪ್ರಾಯವನ್ನು ತ್ವರಿತವಾಗಿ ಹಂಚಿಕೊಳ್ಳಲು ಅನುಮತಿಸುತ್ತದೆ. WhatsAppನಲ್ಲಿ ಎಮೋಜಿಗಳು ಮತ್ತು ಸ್ಕಿನ್-ಟೋನ್‌ಗಳು ಬರಲಿವೆ ಎಂದು WhatsApp ಮುಖ್ಯಸ್ಥರಾದ ವಿಲ್ ಕ್ಯಾತ್ ಕಾರ್ಟ್ ಅವರು ತಿಳಿಸಿದ್ದಾರೆ.
2GB ವರೆಗಿನ ದೊಡ್ಡ ಫೈಲ್‌ಗಳನ್ನು ಹಂಚಿಕೊಳ್ಳಬಹುದಾದ ವೈಶಿಷ್ಟ್ಯವನ್ನು WhatsApp ಅಪ್ಲಿಕೇಷನ್ ನಲ್ಲಿ ತರಲಾಗುತ್ತಿದೆ. WhatsApp ಅಪ್ಲಿಕೇಷನ್ ಮೂಲಕ ಫೈಲ್‌ಗಳ ಹಂಚಿಕೆ ಮಿತಿಯನ್ನು ಹೆಚ್ಚಿಸಲು WhatsApp ಸಿದ್ಧವಾಗಿದೆ. ಈ ಹೊಸ ವೈಶಿಷ್ಟ್ಯದ ಅಧಿಕೃತ ರೋಲ್‌ಔಟ್‌ಗೆ ಮುಂಚಿತವಾಗಿ ಫೈಲ್ ಫಾರ್ಮ್ಯಾಟ್ ಕುರಿತು ವಿವರಗಳನ್ನು ಬಹಿರಂಗಪಡಿಸಲಾಗಿದೆ. ಪ್ರಸ್ತುತ WhatsApp ಅಪ್ಲಿಕೇಷನ್ ನಲ್ಲಿ 100MB ಯಷ್ಟು ಫೈಲ್‌ಗಳನ್ನು ಮಾತ್ರ ಹಂಚಿಕೊಳ್ಳಬಹುದಿತ್ತು ಎಂಬುದನ್ನು ನಾವಿಲ್ಲಿ ಗಮನಿಸಬಹುದು.
WhatsApp ಇದೀಗ ತನ್ನ ಅಪ್ಲಿಕೇಷನ್ ನಲ್ಲಿ ಮತ್ತೊಂದು ಮಹತ್ತರ ಬದಲಾವಣೆಯನ್ನು ತರುತ್ತಿದ್ದು WhatsApp ಗ್ರೂಪ್ ಕರೆಗಳಲ್ಲಿ ಒಟ್ಟು 32 ಜನರು ಪಾಲ್ಗೊಳ್ಳಬಹುದಾದ ಅವಕಾಶವನ್ನು ನೀಡುತ್ತಿದೆ. WhatsApp ಗ್ರೂಪ್ ನಲ್ಲಿ ಹೆಚ್ಚಿನ ಸದಸ್ಯರಿಗೆ ಅವಕಾಶ ಕಲ್ಪಿಸಲು ಕರೆ ಭಾಗವಹಿಸುವವರನ್ನು ಪರದೆಯ ಮೇಲೆ ಹೇಗೆ ಪ್ರದರ್ಶಿಸಲಾಗುತ್ತದೆ ಎಂಬುದನ್ನು ಅಪ್ಲಿಕೇಶನ್ ತಿಳಿಸಿದೆ. ಇದಕ್ಕಾಗಿ WhatsApp ವೇವ್‌ಫಾರ್ಮ್ ಗ್ರಾಫಿಕ್ಸ್ ಅನ್ನ ಬಳಸುಲಿದೆ. ಪ್ರಸ್ತುತ 8 ಜನರಿಗೆ ಮಾತ್ರ WhatsApp ಗ್ರೂಪ್ ಕರೆಗೆ ಅವಕಾಶವಿತ್ತು.
ಮುಂಬರುವ WhatsApp ಅಪ್‌ಡೇಟ್‌ನಲ್ಲಿ WhatsApp ಗ್ರೂಪ್ ಅಡ್ಮಿನ್‌ಗಳು ತಮ್ಮ ಗ್ರೂಪ್‌ಗಳ ಮೇಲೆ ಹೆಚ್ಚಿನ ನಿಯಂತ್ರಣ ಹೊಂದಲಿದ್ದಾರೆ. ಇದಕ್ಕಾಗಿ WhatsApp ಗ್ರೂಪ್ ಅಡ್ಮಿನ್‌ಗೆ ಹೆಚ್ಚು ನಿಯಂತ್ರಣದ ಹೊಸ ವೈಶಿಷ್ಟ್ಯವನ್ನು ತರಲಾಗುತ್ತಿದ್ದು ಈ ವೈಶಿಷ್ಟ್ಯದ ರೋಲ್‌ಔಟ್ ಆದ ನಂತರ ಗ್ರೂಪಿನಲ್ಲಿ ಎಲ್ಲರೂ ಕಳುಹಿಸಬಹುದಾದ ಸಂದೇಶಗಳನ್ನು ಡಿಲೀಟ್ ಮಾಡಬಹುದಾದ ಆಯ್ಕೆಯನ್ನು ಹೊಂದಲಿದ್ದಾರೆ. ಆದರೆ ಸದ್ಯಕ್ಕೆ ಈ ಹೊಸ ನಿಯಂತ್ರಣಗಳ ಮಿತಿಗಳು ಮತ್ತು ವಿನಾಯಿತಿಗಳನ್ನು ಬಹಿರಂಗಪಡಿಸಿಲ್ಲ.
WhatsApp ತನ್ನ ಬಳಕೆದಾರರಿಗಾಗಿ ಬಹು ನಿರೀಕ್ಷಿತ ಕಮ್ಯುನಿಟಿಸ್ ವೈಶಿಷ್ಟ್ಯವನ್ನು ಸಹ ಪ್ರಾರಂಭಿಸುತ್ತಿದ್ದು ಈ ವೈಶಿಷ್ಟ್ಯವು ಪ್ರತ್ಯೇಕ ಗುಂಪುಗಳನ್ನು ಒಟ್ಟುಗೂಡಿಸಲು ಸಕ್ರಿಯಗೊಳಿಸುತ್ತದೆ ಎಂದು WhatsApp ಸಂಸ್ಥೆ ತಿಳಿಸಿದೆ. ಉದಾಹರಣೆಗೆ ಶಾಲಾ ಪ್ರಾಂಶುಪಾಲರು ಕಡ್ಡಾಯವಾಗಿ ಓದಬೇಕಾದ ನವೀಕರಣಗಳನ್ನು ಹಂಚಿಕೊಳ್ಳಲು ಎಲ್ಲಾ ಪೋಷಕರನ್ನು ಒಟ್ಟಿಗೆ ಸೇರಿಸಬಹುದು ಮತ್ತು ನಿರ್ದಿಷ್ಟ ತರಗತಿಗಳು, ಪಠ್ಯೇತರ ಚಟುವಟಿಕೆಗಳು ಅಥವಾ ಸ್ವಯಂಸೇವಕ ಅಗತ್ಯಗಳ ಬಗ್ಗೆ ಗುಂಪುಗಳನ್ನು ಹೊಂದಿಸಬಹುದಾಗಿದೆ.